Abra Clergy Condemns Rising Violence in Abra, Calls for Peace and Justice

​The Clergy of the Diocese of Bangued has strongly condemned the escalating violence and killings in the Province of Abra. In a statement read during all masses across the province on September 15, 2024, the presbyterium emphasized the sanctity of human life, reminding the faithful that every person is made in the image of God and must be treated with respect and protection. The clergy urged law enforcers and the public to work towards peace through charity, justice, and non-violence.

The statement reads:

Patpatgenmi a Gimong ni Cristo ditoy Abra,
 
“Siasinoman a mangpatay iti tao, patayento met ti padana a tao. Ngamin naaramid ti tao a kaasping ti Dios.” (Genesis 9: 6)
 
Iti Espiritu ti ayat, kaasi ken panagkaykaysa, dakami, Katoliko a papadi ti Diocesis ti Bangued, adtoykam a mangidanon kadakayo nga arban ni Cristo kadagiti sumaganad a balikas ken takder. Kas ministrona, inawagan ken imbaonnakami ni Cristo nga instrumento ti kappia, mangtagiben iti kinapateg ti biag, ket tumulong nga agserbi iti pada a tao.
 
Adtoykami a mangitakder a napnoan-bileg ti panangkontra ken panangkondenar kadagiti kinaranggas ken pammapatay a nangramaramen kadagiti gimgimongtayo, aglalo ditoy probinsiatayo nga Abra.
 
Paglidayanmi ti makaimatang iti pannakagudas wenno pannakadangran ti biag gapu iti naranggas a wagas, ket makipagladingitkami kadagiti pamilia ken gimong a winarawara dagiti pammapatay panagbutbuteng ken panaglidliday. Ti tunggal aramid ti kinaranggas saanna la a pukawen ti biag ti tao no di pay ket ukasenna ti nairut a singgalut a namagkakamang kadagiti gimgimong ken ballikugenna dagiti pannursuro ni Jesus a nangipaganetget kadatayo ti panagayat iti kaaruba a kas iti bukod a bagi.
 
Patienmi a ti tunggal tao ket naaramid a kaing-ingas ti Dios, maikari a maraem, mapadayawan, ken masalakniban. Awaganmi man dagiti agtuturay, dagiti gimgimong, ken amin a tattao ta siaayatda koma a mangabrasa iti non-violence, makitugaw para iti nakappia a panagpapatang (dialogo), ken mangbirok iti pannakaurnos dagiti nagdidiperensiaan.
 
Guyugoyenmi ti amin a mangipagna iti kappia babaen kadagiti aramid ti kinamanangngaasi ken naayat a pannakipagrikna, manglapped iti gura ken panagsisina, ken mangitandudo iti hustisia babaen kadagiti nalinteg ken makabiag a pamuspusan.
 
Kas Iglesia, ikumitmi ti naregta a panangsuporta kadagiti panggep a makaited-sungbat kadagiti nagsusubangan, pannakatubay dagiti gimong, ken pannakaipakat dagiti nasayaat a wagas. Awisenmi ti tunggal kameng ti gimongtayo a makikaysa kadakami iti panagkararag para kadagiti nadangran ti kinaranggas, ket mamulida koma a mangitandudo iti kappia kadagiti pagtaenganda, iti purokda, ken iti pagtrabahoanda.
 
Sangsangkamaysatay a tumakder kontra iti kultura ti kinaranggas a mangsina-sina kadatayo. Naawagantayo kas timek agpaay kadagiti awanan ti timek iti gimong, makikaysa kadagiti mailupit-lupit, ken tumulong a mangagas iti sugat a pinarnuay ti gura.
 
Pagbaliwen koma ti ayat dagiti puspusotayo ken aganninaw koma ti namnama ti nakappia a masakbayan kadagiti aramidtayo.
 
Iti sidong ti grasia ken kappia a nadiosan,
 
Abra Clergy
Diocese of Bangued